డిజెఎఫ్ రాష్ట్ర మహాసభల వాల్ పోస్టర్ ఆవిష్కరించిన ఎంపీ రఘునందన్‌రావు
అక్టోబర్ 7న సంగారెడ్డిలో 11వ రాష్ట్ర మహాసభలకు హాజరుకావాలని ఎంపీ రఘునందన్‌రావుకు ఆహ్వానం
సంగారెడ్డి సెప్టెంబర్ 20, (V PRIME NEWS):
సంగారెడ్డి, సెప్టెంబర్ 18 (V PRIME NEWS):
దళిత జర్నలిస్టుల ఫోరం (డిజెఎఫ్) ఆధ్వర్యంలో అక్టోబర్ 7న సంగారెడ్డిలో నిర్వహించనున్న 11వ రాష్ట్ర మహాసభల వాల్ పోస్టర్‌ను ఎంపీ రఘునందన్‌రావు ఆవిష్కరించారు. ఈ సందర్భంగా డిజెఎఫ్ నాయకులు ఎంపీని కలిసి రాష్ట్ర మహాసభలకు హాజరుకావాలని ఆహ్వానించారు.
మహాసభల నిర్వహణపై వివరించిన డిజెఎఫ్ నాయకులు
శుక్రవారం సంగారెడ్డి పట్టణంలో డిజెఎఫ్ రాష్ట్ర అధ్యక్షుడు తలారి యాదగిరి, ఉమ్మడి మెదక్ జిల్లా అధ్యక్షుడు రాపాక విజయరాజు, జిల్లా అధ్యక్షుడు రామని అశోక్ ఆధ్వర్యంలో నాయకులు ఎంపీ రఘునందన్‌రావును కలిశారు. ఈ సందర్భంగా మహాసభల నిర్వహణ, లక్ష్యాలు, దళిత జర్నలిస్టులు ఎదుర్కొంటున్న సమస్యలు, ప్రధాన డిమాండ్లను ఎంపీకి వివరించారు.
పోతిరెడ్డిపల్లి ఎక్స్‌ రోడ్‌లోని పీఎస్‌ఆర్ గార్డెన్ ఫంక్షన్ హాల్‌లో 11వ రాష్ట్ర మహాసభలు నిర్వహించనున్నట్లు తెలిపారు. దళిత జర్నలిస్టుల హక్కుల సాధన, సమస్యల పరిష్కారం, సామాజిక న్యాయం కోసం మహాసభల్లో పలు తీర్మానాలు చేయనున్నట్లు పేర్కొన్నారు.
దళిత జర్నలిస్టులకు ప్రత్యేక కార్పొరేషన్ ఏర్పాటు చేయాలి
దళిత జర్నలిస్టుల కోసం ప్రత్యేక కార్పొరేషన్ ఏర్పాటు చేయాలని డిజెఎఫ్ నాయకులు డిమాండ్ చేశారు. అర్హులైన దళిత జర్నలిస్టులందరికీ అక్రిడిటేషన్ కల్పించడంతో పాటు ఇళ్ల స్థలాలు, పిల్లలకు ఉచిత విద్య, కుటుంబ సభ్యులకు పరిమితి లేని వైద్య సదుపాయం అందించాలని కోరారు. అలాగే ఉచిత బస్‌, రైలు పాసులు కల్పించాలని విజ్ఞప్తి చేశారు.
అభయహస్తం కింద రూ.12 లక్షలు ఇవ్వాలి
అభయహస్తం కింద జర్నలిస్టులకు రూ.12 లక్షల ఆర్థిక సహాయం అందించాలని, అకాల మరణం చెందిన జర్నలిస్టుల కుటుంబాలకు రూ.50 లక్షల ఎక్స్‌గ్రేషియా ఇవ్వాలని నాయకులు కోరారు. నిరుద్యోగ జర్నలిస్టులకు నెలకు రూ.15 వేల నిరుద్యోగ భృతి అందించాలని విజ్ఞప్తి చేశారు.
సీనియర్ జర్నలిస్టులకు నామినేటెడ్ పదవుల్లో అవకాశం
సీనియర్ దళిత జర్నలిస్టులకు నామినేటెడ్ పదవులతో పాటు ప్రెస్ అకాడమీ చైర్మన్‌, సభ్యులుగా అవకాశం కల్పించాలని డిజెఎఫ్ నాయకులు కోరారు. దళిత జర్నలిస్టుల సమస్యలను మహాసభల వేదికగా చర్చించి, వాటి పరిష్కారానికి ప్రభుత్వంపై ఒత్తిడి తీసుకురావాలని నిర్ణయించినట్లు తెలిపారు.
మహాసభలను విజయవంతం చేయాలని పిలుపు
దళిత జర్నలిస్టుల హక్కులు, సంక్షేమం, సామాజిక న్యాయం కోసం నిర్వహిస్తున్న 11వ రాష్ట్ర మహాసభలను విజయవంతం చేసేందుకు జర్నలిస్టులు, మేధావులు, ప్రజా సంఘాలు సహకరించాలని డిజెఎఫ్ నాయకులు విజ్ఞప్తి చేశారు.
ఈ కార్యక్రమంలో తెలంగాణ అంబేద్కర్ సేవా సమితి రాష్ట్ర అధ్యక్షుడు కొండాపురం జగన్, డిజెఎఫ్ రాష్ట్ర ఉపాధ్యక్షుడు, సీనియర్ జర్నలిస్ట్ దేవదాసు, సోషల్ మీడియా ఇన్‌చార్జ్ హెచ్. దాసు, జిల్లా కార్యదర్శి శంకర్, సలహాదారు మీనంపల్లి కిషన్‌రావు, జిల్లా కార్యదర్శి ముక్కగల్ల యాదన్న, జిల్లా ఉపాధ్యక్షుడు దానం మోహన్ తదితరులు పాల్గొన్నారు.
(Journalist – Rapaka VijayaRaju)