శివంపేటలో బీజేపీలోకి భారీగా యువత చేరికలు!

అందోల్‌లో పార్టీ బలోపేతమే లక్ష్యం.. మంత్రి దామోదర రాజనర్సింహపై బీబీ పాటిల్ విమర్శలు.. 2029 ఎన్నికల్లో విజయమే ధ్యేయమన్న గోదావరి అంజిరెడ్డి

సంగారెడ్డి, అక్టోబర్ 12 (V PRIME NEWS):

సంగారెడ్డి, అక్టోబర్ 12 (V PRIME NEWS): సంగారెడ్డి జిల్లాలో భారతీయ జనతా పార్టీని క్షేత్రస్థాయిలో బలోపేతం చేసే దిశగా నాయకులు అడుగులు వేస్తున్నారు. అందులో భాగంగా అందోల్ నియోజకవర్గం చౌట్కూర్ మండలం శివంపేట గ్రామంలో బీజేపీ ఆధ్వర్యంలో చేరికల కార్యక్రమం నిర్వహించారు. బీజేపీ ఎస్సీ మోర్చా సంగారెడ్డి జిల్లా అధ్యక్షుడు చంటి ప్రభు ఆధ్వర్యంలో వివిధ పార్టీలకు చెందిన పలువురు యువకులు కాషాయ కండువాలు కప్పుకుని బీజేపీలో చేరారు.
ఈ కార్యక్రమానికి జహీరాబాద్ మాజీ ఎంపీ, తెలంగాణ క్రికెట్ అసోసియేషన్ అధ్యక్షుడు బీబీ పాటిల్, బీజేపీ సంగారెడ్డి జిల్లా అధ్యక్షురాలు గోదావరి అంజిరెడ్డి ముఖ్య అతిథులుగా హాజరయ్యారు. కొత్తగా పార్టీలో చేరిన యువకులకు కండువాలు కప్పి స్వాగతం పలికారు.

అభివృద్ధిపై మంత్రి దామోదర రాజనర్సింహకు బీబీ పాటిల్ ప్రశ్నలు
ఈ సందర్భంగా బీబీ పాటిల్ మాట్లాడుతూ అందోల్ నియోజకవర్గంలో ఆశించిన స్థాయిలో అభివృద్ధి జరగలేదని ఆరోపించారు. రాష్ట్ర వైద్యారోగ్య శాఖ మంత్రి దామోదర రాజనర్సింహ నియోజకవర్గ అభివృద్ధిపై మరింత దృష్టి సారించాలని సూచించారు. ప్రజలకు ఇచ్చిన హామీల అమలు, రహదారుల పరిస్థితి వంటి అంశాలే అభివృద్ధికి కొలమానాలని పేర్కొన్నారు.
శివంపేటలో యువత పెద్ద సంఖ్యలో బీజేపీలో చేరడం పార్టీకి కొత్త ఉత్సాహాన్నిస్తుందని తెలిపారు. యువతను కలుపుకొని ప్రజా సమస్యల పరిష్కారానికి కృషి చేస్తామని చెప్పారు.

రహదారులు, ప్రభుత్వ ఆసుపత్రులపై దృష్టి పెట్టాలి: చంటి ప్రభు
బీజేపీ ఎస్సీ మోర్చా సంగారెడ్డి జిల్లా అధ్యక్షుడు చంటి ప్రభు మాట్లాడుతూ అందోల్ నియోజకవర్గంలో రహదారుల దుస్థితి ప్రజలకు ఇబ్బందులు కలిగిస్తోందని అన్నారు. ప్రభుత్వ ఆసుపత్రుల్లో మెరుగైన వైద్య సేవలు, అవసరమైన మౌలిక సదుపాయాలు కల్పించాలని ప్రభుత్వాన్ని కోరారు.
ప్రజా సమస్యల పరిష్కారంలో నిర్లక్ష్యం కొనసాగితే బీజేపీ ఆధ్వర్యంలో ప్రజల తరఫున ఉద్యమాలు చేపడతామని హెచ్చరించారు. పార్టీలో చేరిన యువకులు ప్రజలతో మమేకమై స్థానిక సమస్యల పరిష్కారానికి కృషి చేయాలని పిలుపునిచ్చారు.

2029 ఎన్నికల్లో బీజేపీ విజయమే లక్ష్యం: గోదావరి అంజిరెడ్డి
బీజేపీ సంగారెడ్డి జిల్లా అధ్యక్షురాలు గోదావరి అంజిరెడ్డి మాట్లాడుతూ తెలంగాణలో 2029 ఎన్నికల్లో పార్టీ విజయానికి ప్రతి కార్యకర్త కృషి చేయాలని పిలుపునిచ్చారు. అందోల్ నియోజకవర్గంలో బీజేపీని మరింత బలోపేతం చేసేందుకు యువత కీలక పాత్ర పోషించాలని అన్నారు. కేంద్ర ప్రభుత్వ పథకాలు, పార్టీ సిద్ధాంతాలను ప్రజల్లోకి తీసుకెళ్లడంతో పాటు స్థానిక సమస్యలపై నిరంతరం పోరాడాలని సూచించారు. పార్టీలో చేరిన యువకులకు తగిన ప్రాధాన్యత కల్పిస్తామని తెలిపారు.

ఈ కార్యక్రమంలో బీజేపీ జిల్లా ప్రధాన కార్యదర్శి రాశేకర్ రెడ్డి, జిల్లా నాయకుడు జగదీశ్వర్ పాటిల్, జిల్లా కార్యదర్శి భూమన, యువమోర్చా సంగారెడ్డి జిల్లా అధ్యక్షుడు బొర్రా ప్రవీణ్ యాదవ్, యువమోర్చా రాష్ట్ర కోశాధికారి నరేంద్ర దేశ్‌పాండే, మైనారిటీ మోర్చా జిల్లా అధ్యక్షుడు బుట్టో, లేబర్ సెల్ కన్వీనర్ నాయకోటి యాదగిరి, ప్రొఫెషనల్ సెల్ కన్వీనర్ పటంగి సత్యనారాయణ, అందోల్ అసెంబ్లీ లీగల్ సెల్ కన్వీనర్ కలాలి వినోద్ కుమార్, యువమోర్చా జిల్లా ప్రధాన కార్యదర్శి తెణుగు సాయి తేజ, యువ న్యాయవాది చంటిక దేవిక తదితరులు పాల్గొన్నారు.
అలాగే కిసాన్ సెల్ జిల్లా కార్యాలయ కార్యదర్శి సార రాజు, చౌట్కూర్ మండల ఉపాధ్యక్షులు ముకుందం, ప్రవీణ్ రెడ్డి, ప్రభు కుమార్, సాయి, వెండికోల శివ తదితర నాయకులు, కార్యకర్తలు హాజరయ్యారు. చౌట్కూర్ మండల బీజేపీ అధ్యక్షుడు నీరుడి ప్రవీణ్ కార్యక్రమానికి అధ్యక్షత వహించారు.
కార్యక్రమాన్ని విజయవంతం చేసిన నాయకులు, కార్యకర్తలకు, పార్టీలో చేరిన యువకులకు చంటి ప్రభు కృతజ్ఞతలు తెలిపారు.
V PRIME NEWS — ప్రజల కోసం.. ప్రజల గొంతుకగా!