ప్రతి భూ యజమానికి ‘భూదార్’.. ఆధార్ తరహాలో ప్రత్యేక గుర్తింపు సంఖ్య

ఉపగ్రహ చిత్రాలతో భూ పటాలు.. పట్టాదారు పాస్ పుస్తకాల్లో పొందుపరచనున్న ప్రభుత్వం

తొలి విడతలో ప్రతి జిల్లాలో 70 రెవెన్యూ గ్రామాల్లో భూ సర్వే

డబుల్ బెడ్‌రూమ్ ఇళ్ల కేటాయింపునకు 15 రోజుల గడువు

ఎల్‌నినో ప్రభావంతో తాగునీటి సమస్యలు తలెత్తే అవకాశం.. రెండో పంట సాగుపై రైతులు అప్రమత్తంగా ఉండాలి

సంగారెడ్డి, అక్టోబర్ 27 (V PRIME NEWS)

సంగారెడ్డి, అక్టోబర్ 27 (V PRIME NEWS): రాష్ట్రంలో భూ సమస్యలకు శాశ్వత పరిష్కారం చూపడం, భూ యజమానుల హక్కులకు భరోసా కల్పించడం, భూ రికార్డుల నిర్వహణలో పారదర్శకత తీసుకురావడమే లక్ష్యంగా ప్రభుత్వం కీలక చర్యలు చేపడుతోందని మంత్రులు దామోదర్ రాజనర్సింహ, పొంగులేటి శ్రీనివాసరెడ్డి, వివేక్ వెంకటస్వామి తెలిపారు. భూభారతి చట్టం అమలులో భాగంగా ప్రతి భూ యజమానికి ఆధార్ తరహాలో ‘భూదార్’ పేరుతో ప్రత్యేక గుర్తింపు సంఖ్య కేటాయించనున్నట్లు వెల్లడించారు. ఉపగ్రహ చిత్రాలతో కూడిన భూ పటాలను పట్టాదారు పాస్ పుస్తకాల్లో పొందుపరచనున్నట్లు పేర్కొన్నారు.

మంగళవారం సంగారెడ్డి జిల్లా పరిషత్ సమావేశ మందిరంలో ఉమ్మడి మెదక్ జిల్లాకు చెందిన రెవెన్యూ, స్టాంప్స్ అండ్ రిజిస్ట్రేషన్స్, గృహ నిర్మాణ శాఖల అధికారులతో మంత్రులు సమీక్ష నిర్వహించారు. అనంతరం మీడియాతో మాట్లాడిన వారు భూ సర్వే, డబుల్ బెడ్‌రూమ్ ఇళ్ల కేటాయింపు, తాగునీటి లభ్యత, ఎల్‌నినో ప్రభావం వంటి అంశాలపై ప్రభుత్వ ప్రాధాన్యతలను వివరించారు.

తొలి విడతలో ప్రతి జిల్లాలో 70 గ్రామాల్లో సర్వే

భూభారతి చట్టం అమలులో భాగంగా భూ సర్వే కార్యక్రమాన్ని ప్రారంభించినట్లు మంత్రి పొంగులేటి శ్రీనివాసరెడ్డి తెలిపారు. గతంలో ధరణి విధానంలో ఎదురైన సమస్యలకు పరిష్కారం చూపుతూ భూ పరిపాలనలో పారదర్శకత పెంచడమే ప్రభుత్వ లక్ష్యమన్నారు. తొలి విడతలో రాష్ట్రంలోని ప్రతి జిల్లాలో 70 రెవెన్యూ గ్రామాల్లో సర్వే చేపట్టేందుకు చర్యలు తీసుకుంటున్నట్లు వెల్లడించారు.

భూముల హద్దులు, విస్తీర్ణం, రికార్డుల్లోని వివరాలపై స్పష్టత తీసుకురావాలని అధికారులకు సూచించినట్లు తెలిపారు. సర్వేను నిర్దేశిత లక్ష్యాల ప్రకారం పూర్తి చేసి, భూ యజమానులకు ఇబ్బందులు లేకుండా చూడాలని ఆదేశించినట్లు పేర్కొన్నారు.

భూ హక్కుల పరిరక్షణకు ప్రాధాన్యత

ఉమ్మడి మెదక్ జిల్లాలో నిర్వహిస్తున్న సమీక్ష ఎనిమిదో సమావేశమని మంత్రి దామోదర్ రాజనర్సింహ తెలిపారు. భూ సమస్యల పరిష్కారంతో పాటు పేదలు, రైతులు సహా అన్ని వర్గాల భూ యజమానుల హక్కులను కాపాడటమే ప్రభుత్వ ప్రధాన ఉద్దేశమన్నారు. అర్హులకు న్యాయం జరిగేలా పారదర్శక విధానాలను అమలు చేస్తామని స్పష్టం చేశారు.

15 రోజుల్లో డబుల్ బెడ్‌రూమ్ ఇళ్ల కేటాయింపు పూర్తి

గతంలో అసంపూర్తిగా నిలిచిపోయిన రెండు పడక గదుల ఇళ్ల నిర్మాణాలను పూర్తి చేసి అర్హులైన పేదలకు అందించే ప్రక్రియను ప్రభుత్వం వేగవంతం చేసిందని మంత్రి తెలిపారు. ఇప్పటికే సుమారు 90 శాతం ఇళ్ల కేటాయింపు ప్రక్రియ చేపట్టినట్లు వివరించారు. కులం, మతం, ప్రాంతం, రాజకీయ పార్టీలతో సంబంధం లేకుండా అర్హత ఆధారంగా లబ్ధిదారులను ఎంపిక చేస్తున్నట్లు పేర్కొన్నారు.

మిగిలిన ఇళ్లను కూడా మరో 15 రోజుల్లోగా అర్హులకు కేటాయించాలని అధికారులను ఆదేశించినట్లు వెల్లడించారు. ప్రజలకు ప్రభుత్వ సేవలు మరింత చేరువయ్యేలా అవసరమైన ప్రాంతాల్లో ప్రభుత్వ కార్యాలయాల నిర్మాణాలను కూడా వేగవంతం చేయనున్నట్లు తెలిపారు.

ఎల్‌నినో ప్రభావంపై ముందస్తు జాగ్రత్తలు

ఎల్‌నినో ప్రభావంతో రానున్న రోజుల్లో నీటి లభ్యతపై ఒత్తిడి పెరిగే అవకాశాలున్నాయని మంత్రులు పొంగులేటి శ్రీనివాసరెడ్డి, దామోదర్ రాజనర్సింహ ఆందోళన వ్యక్తం చేశారు. ఇప్పటికే సింగూరు వంటి ప్రాజెక్టుల్లో నీటి సమస్యలు కనిపిస్తున్నాయని, భవిష్యత్తులో ఇతర జలాశయాల్లోనూ తాగునీటి లభ్యతపై ఇబ్బందులు ఎదురయ్యే అవకాశం ఉందని తెలిపారు.

తాగునీటి అవసరాలకు అత్యధిక ప్రాధాన్యత ఇవ్వాల్సిన పరిస్థితులు రావచ్చని పేర్కొన్నారు. రెండో పంటకు నీరు, విద్యుత్ అందించేందుకు ప్రభుత్వం చర్యలు తీసుకున్నప్పటికీ, నీటి వనరుల లభ్యతే ప్రధాన సవాలుగా మారే ప్రమాదం ఉందన్నారు. ఈ పరిస్థితి తెలంగాణకే పరిమితం కాకుండా దేశవ్యాప్తంగా ఆందోళన కలిగిస్తోందని వివరించారు.

రెండో పంట సాగుపై రైతులు ఆలోచించాలి

నీటి వనరుల పరిస్థితిని దృష్టిలో ఉంచుకొని రైతులు ప్రభుత్వానికి సహకరించాలని మంత్రి విజ్ఞప్తి చేశారు. తాగునీటి అవసరాలకు ఇబ్బందులు తలెత్తకుండా రెండో పంట సాగు విషయంలో అప్రమత్తంగా వ్యవహరించాలని కోరారు. నీటి కొరతపై ప్రజలకు వాస్తవ పరిస్థితులను వివరించడంలో ప్రతిపక్షాలు కూడా బాధ్యతాయుతంగా వ్యవహరించాలని సూచించారు.

రాష్ట్రానికి రావాల్సిన హక్కులు, నిధుల విషయంలో కేంద్ర ప్రభుత్వం సహకరించాలని కోరుతున్నట్లు మంత్రులు తెలిపారు. ఈ అంశాలపై చర్చించేందుకు అఖిలపక్ష సమావేశాన్ని ఏర్పాటు చేసినట్లు వెల్లడించారు. ప్రజల సంక్షేమం, రైతుల ప్రయోజనాలు, తాగునీటి అవసరాలను దృష్టిలో ఉంచుకొని ప్రభుత్వం అవసరమైన చర్యలు తీసుకుంటుందని స్పష్టం చేశారు.

Journalist – Rapaka VijayaRaju