ఇస్రో శాస్త్రవేత్తలకు సీఎం రేవంత్ రెడ్డి అభినందనలు

హైదరాబాద్, అక్టోబర్ 31, V PRIME NEWS:

భారత అంతరిక్ష పరిశోధనా సంస్థ (ఇస్రో) సాధించిన మరో విజయంపై తెలంగాణ ముఖ్యమంత్రి ఎ. రేవంత్ రెడ్డి హర్షం వ్యక్తం చేశారు. GSLV-F18 రాకెట్ ద్వారా NVS-03 నావిగేషన్ ఉపగ్రహాన్ని విజయవంతంగా ప్రయోగించిన సందర్భంగా ఇస్రో శాస్త్రవేత్తలు, ఇంజినీర్లు, సిబ్బందికి అభినందనలు తెలిపారు.
NVS-03 ఉపగ్రహాన్ని నిర్దేశిత భూస్థిర కక్ష్యలోకి ప్రవేశపెట్టడం భారతదేశ నావిగేషన్ సామర్థ్యాలను మరింత బలోపేతం చేసే కీలక మైలురాయి అని సీఎం ప్రశంసించారు.

ఈ ఉపగ్రహం ద్వారా రవాణా, విమానయానం, సముద్ర నావిగేషన్, పర్యవేక్షణ, అత్యవసర సేవలు వంటి కీలక రంగాల్లో మెరుగైన సేవలు అందుబాటులోకి రానున్నాయని పేర్కొన్నారు.
ఇస్రో సాధించిన ఈ విజయం యావత్ దేశానికి గర్వకారణమని సీఎం రేవంత్ రెడ్డి అన్నారు. భవిష్యత్తులోనూ భారత అంతరిక్ష పరిశోధనా సంస్థ మరిన్ని అద్భుత విజయాలు సాధించాలని ఆకాంక్షించారు.