జోగిపేట 120 పడకల ప్రభుత్వ దవాఖానకు మఖ్దూం మొహియుద్దీన్ పేరు పెట్టాలి
మహాకవి పేరుతో ఆసుపత్రికి నామకరణం చేయాలి: ఎస్సీ, ఎస్టీ అట్రాసిటీ విజిలెన్స్ అండ్ మానిటరింగ్ కమిటీ సభ్యుడు కాశపాగ ఇమ్మయ్య
జోగిపేట, సెప్టెంబర్ 18 (V PRIME NEWS): జోగిపేటలో నూతనంగా ఏర్పాటు చేస్తున్న 120 పడకల ప్రభుత్వ దవాఖానకు అందోల్ ప్రాంతానికి చెందిన మహాకవి మఖ్దూం మొహియుద్దీన్ పేరు పెట్టాలని ఎస్సీ, ఎస్టీ అట్రాసిటీ విజిలెన్స్ అండ్ మానిటరింగ్ కమిటీ సభ్యుడు కాశపాగ ఇమ్మయ్య ప్రభుత్వాన్ని డిమాండ్ చేశారు. మఖ్దూం మొహియుద్దీన్ పేరును ప్రభుత్వ ఆసుపత్రికి పెట్టడం ద్వారా ఆయన సేవలు, సాహిత్య ప్రస్థానం, ప్రజా ఉద్యమాల చరిత్రను భవిష్యత్ తరాలకు గుర్తుచేసినట్లవుతుందని అన్నారు.
అందోల్ గడ్డపై పుట్టిన మహాకవి
అందోల్‌లో జన్మించిన మఖ్దూం మొహియుద్దీన్ ప్రపంచవ్యాప్తంగా గుర్తింపు పొందిన సుప్రసిద్ధ మహాకవిగా పేరుగాంచారని ఇమ్మయ్య పేర్కొన్నారు. కవి, రచయితగా మాత్రమే కాకుండా ప్రజా ఉద్యమాల్లో కీలక పాత్ర పోషించిన మహనీయుడిగా ఆయనను కొనియాడారు. అలాంటి మహనీయుని పేరును ప్రభుత్వ దవాఖానకు పెట్టడం ఈ ప్రాంత ప్రజలకు స్ఫూర్తినిస్తుందని అన్నారు.
తెలంగాణ సాయుధ పోరాటంలో కీలక పాత్ర
నిజాం పాలనకు వ్యతిరేకంగా సాగిన తెలంగాణ సాయుధ పోరాటంలో మఖ్దూం మొహియుద్దీన్ కీలకపాత్ర పోషించారని ఇమ్మయ్య తెలిపారు. ఉద్యమకారుడిగా, ఉద్యమ కవిగా, విప్లవ రచయితగా నమ్మిన సిద్ధాంతాలకు కట్టుబడి జీవితాంతం ప్రజల పక్షాన కలమెత్తి తన జీవితాన్ని అంకితం చేసిన అరుదైన ప్రజాకవి అని పేర్కొన్నారు.
బహుముఖ ప్రజ్ఞాశాలి మఖ్దూం
మఖ్దూం మొహియుద్దీన్ కవిగా మాత్రమే కాకుండా నాటకకర్తగా, గాయకుడిగా, నటుడిగా కూడా తన ప్రతిభను చాటుకున్న బహుముఖ ప్రజ్ఞాశాలి అని ఇమ్మయ్య అన్నారు. కార్మిక నాయకుడిగా, శాసనసభ్యుడిగా, శాసనమండలి సభ్యుడిగా, ప్రతిపక్ష నేతగా రాష్ట్రానికి సేవలందించిన రాజకీయ యోధుడిగా ఆయనకు ప్రత్యేక గుర్తింపు ఉందన్నారు.
ప్రభుత్వానికి ఇమ్మయ్య విజ్ఞప్తి
ప్రజా సేవకు ప్రతీకగా నిలిచే జోగిపేట నూతన 120 పడకల ప్రభుత్వ దవాఖానకు“మహాకవి మఖ్దూం మొహియుద్దీన్ ప్రభుత్వ దవాఖాన”గా నామకరణం చేయాలని కాశపాగ ఇమ్మయ్య ప్రభుత్వాన్ని కోరారు. ఈ మేరకు ప్రభుత్వం సానుకూలంగా స్పందించి మఖ్దూం మొహియుద్దీన్ సేవలను గౌరవించాలని ఆయన విజ్ఞప్తి చేశారు.